Magandang umaga sa direktor ng Sunday PINASaya na si G. Rich Ilustre:
Maigi naman at nagpaumanhin ka na bagamat hindi ka pa humihingi ng dispensa sa mga kasambahay na “half asleep” mong nilibak. Tinatanggap namin ang iyong dispensa pero may ilang mahahalagang bagay na dapat mong maunawaan at tugunan.
Dapat maunawaan mo na isang PR horror itong nilikha mo–kalat na kailangan mong linisin. Mariin kong iminumungkahi na linisin mo ang kalat na ito sa pamamagitan ng permanenteng pagtatanggal sa larawan ng aso mong si Maxim na nakabihis-Yaya Dub. Ang mga larawan at tweet na tinutukoy ko ay yung pinaskil mo sa iyong Twitter page noong ika-30 ng Oktubre 2015. Maaaring hindi marumi ang intensyon mo nang magdesisyon kang isapubliko ang mga larawang ito pero dapat ay agad mong naisip na ang mismong mga larawang ito ay lilikha ng di kaaya-ayang interpretasyon at pagtanggap lalo na sa mga tagahanga ng kabilang kampo, ng mga netizens na ang layunin ay libakin, siraan, at i-harass si Maine Mendoza at ang mga ALDUB fans. Ang mga larawang ito, sa katunayan, ay ginagamit na ngayon ng mga pinakanotoryus na basher sa social media para gawing katawa-katawa ang imahen ng iconic TV character na Yaya Dub, ang artistang gumaganap dito na si Maine Mendoza, at ang kanyang mga tagahanga. Nire-retweet nila ang larawang pinaskil mo at pinapangalanang #ALDOG. Kung hindi mo nalalaman, ang #ALDOG ay pejorative na terminong nilikha ng mga anti-ALDUB fans para siraan ang ALDUB at ang ALDUB Nation.
Bilang propesyonal na nagtatrabaho sa mainstream media, dapat ay naisaaalang-alang mo ito noon pa man, bago pa nangyari ang gusot na nilikha mo.
Uulitin ko, umaasa kaming sa lalong madaling panahon ay permanente mong tatanggalin ang nasabing larawan. Maliit na hakbang ito, kung tutuusin, pero malaking tulong ito sa amin sa layuning lutasin ang cyber bullying at internet harassment na talamak ngayon.
Maraming salamat.
@thefilipinospec
The Filipino Spectator 